(°°) Veröld Gríshildar (°°)

2009-05-16T22:43:00.002Z

Aðfaranótt miðvikudags dreymdi mig lottótölur. Ég keypti auðvitað miða í víkingalottó en lenti í vandræðum því mig dreymdi bara fimm tölur en þurfti að velja sex. Sem var auðvitað ástæðan fyrir því að ég fékk ekki vinning. Ég dró þá ályktun að tölurnar ættu auðvitað við íslenska lottóið. En svo gleymdi ég að kaupa miða.

Sem betur fer kom engin af tölunum sem mig dreymdi upp í kvöld.

2009-05-10T13:40:00.002Z

Ég er búin að vera svolítið á barnaspítala Hringsins undanfarið. Það er þó sem betur fer ekkert af mínum börnum sem ég sit yfir þar heldur einn af skjólstæðinum mínum í vinnunni. Hann er reyndar ekkert barn lengur en þeir á fullorðinsspítalanum kunna víst ekkert á svona merkilegt fólk.

Á meðan ég hef dvalið hér hef ég hugsað um strákinn minn sem er ekki hjá mér. Hann er að verða fimm ára. Ef hann væri hjá mér værum við kannski hér á barnaspítalanum. Hann væri kannski jafn fatlaður og ungi maðurinn sem ég er að annast núna. Þeir eiga það sameiginlegt að hafa orðið fyrir súrefnisskorti við fæðingu.

Ég hef heyrt að það sé fullt af fólki á barmi taugaáfalls því það er að missa vinnuna eða húsið sitt. Ég hefði fórnað vinnunni minni og húsinu ef ég hefði fengið að hafa barnið mitt hjá mér aðeins lengur.

Ég hélt að ég myndi aldrei aftur verða glöð. En mér skjátlaðist. Ég hef oft orðið svakalega glöð síðan. Enda á ég núna tvo stráka í viðbót sem eru endalausir gleðigjafar (og ormar!). Og stóra stelpu sem er svo skynsöm og dugleg að læra. Ég tók við prófskírteini og viðurkenningum í Laugardalshöll. Síðast en ekki síst á ég frábæran lífsförunaut, ekki veitir nú af þegar maður siglir ekki alveg lygnan sjó í gegnum lífið.

Ef þessi pistill hefur einhvern boðskap er hann líklega sá að það eru ekki veraldlegar eigur mínar sem hafa veitt mér mesta hamingju eða valdið mér mestri sorg.

2009-01-30T21:05:00.002Z

Við He-man vorum að lesa í dýra og tölustafabókinni.

Mamma: "Á Íslandi búa tvær tegundir af músum. Húsamús og..."
He-man: "Hagamús. Og músahús í sjónvarpinu!".

Mamma: "Lundinn veiðir fisk með stóra gogginum sínum".
He-man: "Og gefur þessum og þessum og þessum og þessum (bendir á hina lundana á myndinni) og eldar fiskinn líka."

Mamma: "Og hér eru tíu hunangsflugur."
He-man: "Já. Þessi var að kaupa hunang í blóminu."

2009-01-27T13:32:00.002Z

Skröggur stendur með Logann í fanginu. He-man vill líka fá að vera í fangi svo ég tek hann upp. Hann tekur utan um hálsinn á mér, lítur svo upp á pabba sinn og segir: "Mamma er pínu lítil".

Og það er hverju orði sannara.

2009-01-24T14:29:00.002Z

Jimundur hvað er gott að eiga klósett sem virkar. Af því tilefni nældi ég mér í magapest til að hafa afsökun fyrir að sitja þar sem mest.

2009-01-19T13:13:00.002Z

Ég bjó við það um tíma að þurfa að gefa klósettkassanum karatespark til að stöðva rennslið í klósettkassann. Skröggur minn tók sig svo til og "lagaði" flotholtið með þeim glæsta árangri að ekki dugði lengur að sparka heldur þurfti að seilast ofan í klósettkassann og hífa flotholtið upp. Til að spara tíma tók ég lokið af klósettkassanum. Mjög huggulegt.

Morgunn einn (fyrsta vinnudag Skröggs eftir fæðingarorlof) gerði ég þarfir mínar og sturtaði svo niður eins og lög gera ráð fyrir. Þegar ég heyrði kunnulegt fosshljóð fór ég aftur inn á bað og togaði í flotholtið eins og oft áður. Það vildi þá ekki betur til en svo að systemið gaf sig endanlega og ískalt vatn spýttist út um allt baðherbergi. Ég varð rennblaut eins og allt annað inni á baði. Mér tókst að stöðva vatnsflauminn með því að halda við eitthvað drasl ofan í klósettkassanum en þá náði ég ekki niður í kranann til að skrúfa fyrir vatnsrennslið. Mér tókst að skorða draslið með handklæði svo ég gat byrjað að skrúfa fyrir vatnið. Ég skrúfaði og skrúfaði en ekkert gerðist. Hringdi í Skrögg sem fullvissaði mig um að það væri hægt að loka fyrir vatnið þarna. Og þá tókst það auðvitað.

Nú á ég æðislegt upphengt klósett sem gusar ekki á mig vatni. Og út í bílskúr bíða flísar og ný baðinnrétting eftir uppsetningu. Á meðan bursta ég tennurnar við eldhúsvaskinn.

2009-01-15T21:26:00.002Z

Misheyrn.

Í gær var ég á ónafngreindri stofnun vegna vinnunnar.
Starfsmaður stofnunarinnar kom til mín og ávarpaði mig á ensku.

- Fyrirgefðu, hvað sagðirðu?
- Nú, talarðu íslensku?
- Já.
- Nú, já, ég hélt kannski... af því þú ert frá Hollandi...
- Ég er ekki frá Hollandi.
- Nú, mér fannst þær hafa sagt... nei auðvitað... þú ert frá ÁRLANDI!

2008-12-22T14:59:00.003Z

Ég er að stela tíma í vinnunni til að blogga. Ég veit ekki í hvað tíminn minn fer almennt. Allavega ekki í að halda heimilinu mínu snyrtilegu eða að blogga.

Helst í fréttum er að nú er 4/5 hluti af fjölskyldunni klósettþjálfaður. Og veggurinn inni á baðherbergi er þakinn myndum af Bangsímon og félögum. Og aðeins 1/5 hluti af fjölskyldunni notar snuð eftir að jólasveinninn tók allar "duddurnar". 1/4 af börnunum mínum fékk 9,2 á enskuprófi í ens 103.

Sko, nú notaði ég tímann vel. Ég bloggaði og æfði mig í almennum brotum í leiðinni á meðan ég drakk kaffið mitt.

2008-11-21T11:31:00.002Z

Það er allavega ein manneskja sem les bloggið mitt og vill meira. Þessi færsla er tileinkuð henni :-)

Ég er búin í sumarfríinu og byrjuð að vinna. Enn er mér ekkert svo illa við kreppuna, í vinnunni er nefnilega miklu betra ástand núna heldur en þegar ég fór í orlof. Þá vantaði minnir mig í fjögur stöðugildi. Nú vantar ekkert! Er á meðan er. Kannski verður skorið niður og starfsfólki fækkað. Við vitum ekkert hvað gerist.

Synir mínir eru svo skemmtilegir. Sá yngri er að flýta sér að verða stór. Hann stendur upp allsstaðar þar sem hann nær að toga sig upp. Hann þarf að æfa sig svo mikið að stundum stendur hann upp í rúminu sínu á nóttunni. Hann æfir líka fínhreyfingarnar sínar, stingur upp í sig cheeriosi og les á þvottamiða. Sá eldri er aðallega að æfa sig í tungumálinu. Hann flýgur þyrlum og keyrir bíla og segir "rrrrrrrrrrrrrr". Honum finnst gaman að hlusta á Gilligill diskinn og syngur með "mamma, afhverju geturðu ekki verið eins og barbí?" Við áttum eftirfarandi samtal einn morgunninn:

Ég: Nú ætla ég að hjálpa þér í fötin og svo förum við í leikskólann.
Hann: Urg. Nei. Mamma setja í þvottavélina.
Ég: Heyrðu nú mig. Ertu svona mikil karlremba?
Hann: (Ánægður.) Já. Einmitt!

Það er gaman að eiga einn strák. En ennþá meira gaman að eiga tvo :-)

2008-10-23T13:22:00.002Z

Ég held að ég sé veruleikafirrt.
Mér er nefnilega alveg sama þótt Ísland sé á hausnum. Það snertir mig ekkert. Það hefur ekkert breyst hjá mér og ég sé ekki fram á að það verði neinar breytingar. Kannski ég ætti að kíkja upp á geðdeild, það er víst ekkert að gera hjá kreppuáfallateyminu þar.

Og svo var mér sagt að ég þyrði ekki að horfast í augu við sjálfa mig. Vegna þess að ég sagðist ekki þola gospeltónlist og vildi ekki fara á tónleika í Fíladelfíu. Kannski ég láti tékka á því í leiðinni.

2008-10-11T23:07:00.002Z

Það er alveg margt sem er fyndið.
Mér fannst til dæmis mjög fyndið að horfa á innlit-útlit í vikunni. Gufubaðsnuddsturta með útvarpi og síma! Vonandi ekki fjármögnuð með myntkörfuláni.
Tónlistin á Rás 2 þessa dagana fær mig til að glotta út í annað "þó að tilveran sé trist, skaltu út að dansa tvist..."
Bónus auglýsti lambahjörtu í raspi. Mmm verður það ekki bara jólasteikin í ár?
Og svo var stubburinn minn að vanda sig svo mikið við að pissa standandi að hann datt ofan í klósettið. Og fyrst hann meiddi sig ekki má ég alveg hlæja eins og vitleysingur...

2008-10-08T16:58:00.002Z

Ég er með lag á heilanum. Það heitir "Krómkallar".
Hlustið hér.

2008-10-04T23:12:00.003Z

Ég er nú bara svo aldeilis hissa að hafa fengið viðbrögð við síðustu færslu, ekki datt mér annað í hug en að allir væru búnir að gefast upp á mér.

Ég nenni ekki að skrifa um kreppuna. En það hlakkar svolítið í illfyglinu í mér.

Gsm síminn minn vill frekar að lífið sé fáránlegt en dásamlegt. Mér finnst það bara vera bæði.

Undanfarin kvöld hef ég legið yfir lokaverkefninu mínu enn á ný. Ég var að sækja um styrki til að gefa út foreldraritið mitt. Það var erfitt, erfitt. Áhuginn sem dreif mig áfram í vor er ekki til staðar núna. En ég geri ráð fyrir að hann vakni ef ég fæ laun erfiðis míns... gráðuga geitin sem ég er.

Annars er ég andlaus. Og með vömbina fulla af nammi eftir að hafa sprungið á nammibindindinu. Byrja aftur á morgun með hreina samvisku.

2008-09-28T10:23:00.003Z

Það er annaðhvort að blogga eða hætta að blogga. Nema síður sé.
Jæja. Það sem er í frásögur færandi er kannski einna helst nýtilkomin ást mín á líkamsræktarstöðinni Klósett á Nesinu. Þangað fer ég að minnsta kosti þrisvar í viku til að hrista á mér keppina og vonandi af mér líka. Tilfinningarnar eru blendnar, ég druslast af stað og nenni því varla en er svo í sæluvímu þegar ég er búin að koma blóðinu á hreyfingu. Og tel mér trú um að það sé 25000 kr. virði.

Geimgengill og ég lukum tónlistarnámskeiði fyrir ungbörn í síðustu viku. Í sömu viku fór ég þrisvar sinnum í guðshús. Fyrst með He-man í sunnudagskóla, svo á tónlistarnámskeið og loks á foreldramorgunn. Ekki skrítið að ég sé með "Son guðs ertu með sanni" á heilanum...

Ég er að verða búin í fæðingarorlofi. Bara nokkrir dagar eftir. Þá er komið að því að fara í sumarfrí. Í sumarfríinu ætla ég að skreppa til Manchester og dást að bumbunni hennar Rögnu. Kannski kemst ég líka á tónleika með Systrunum :-)

Næst þegar ég blogga verð ég vonandi komin yfir frestunaráráttuna og búin að gera kostnaðaráætlun og sækja um styrki en ég kveikti einmitt á tölvunni núna til þess...

2008-08-10T15:54:00.003Z

Furðulegt háttalag konu í Fjölskyldu- og húsdýragarðinum í dag

Gestir Fjölskyldu- og húsdýragarðsins í Laugardal ráku upp stór augu í dag þegar kvenkyns gestur garðsins hóf skyndilega að dansa furðulegan stríðsdans, ýtti frá sér ungum dreng sem var með henni í för og henti íspinna sem hún hélt á út í runna. Þegar rann af henni hamurinn sótti hún ísinn aftur þurrkaði af honum mestu moldina og rétti barninu. Þau héldu svo sína leið.

2008-07-20T15:37:00.002Z

Hvar hafa blogghæfileikar mínir lit sínum glatað?
Ég er algjörlega úti á túni, dagarnir líða hjá og ég man ekkert í hvað ég eyði þeim. En það ber líklega bara vott um að ég sé að njóta þess að vera heima með fjölskyldunni áhyggjulaus. Og það er allavega ekki leiðinlegt því þá hefði ég eitthvað til að tuða yfir. Það er miklu auðveldara að skrifa tuðblogg en hamingjublogg.

Og þegar maður er svona heima í kósíheitum gerist svo sem ekkert merkilegt. Nema kannski að Skröggur fann brenninetlur í garðinum okkar. Sem betur fer var ég bara hálfnuð með að hreinsa til í beðunum og var ekki komin að þessum ófögnuði því ég þekki varla illgresi frá góðgresi og hefði aldeilis fengið að kenna á eitruðum hárum plöntunnar illu.

Samkvæmt Wikipediu eru brenninetlur þó hreint ekkert illgresi heldur má nota þær til lækninga og sjóða úr þeim te eða súpu. Í franskri matreiðslu eru blöðin hreinsuð, soðin og étin með mat. Svo ef einhver hefur áhuga á að nýta gæði náttúrunnar í kreppunni er viðkomandi boðinn velkominn í garðinn minn hið snarasta til að ná sér í netlur!

2008-07-06T21:10:00.000Z

Samstaða með ljósmæðrum

Samstaða með ljósmæðrum við stjórnarráðið þriðjudaginn 8. júlí kl. 9.30.Ljósmæðrafélag Íslands hefur farið fram á það við ríkisstjórnina að laun þeirra verði leiðrétt til samræmis við laun annarra háskólastétta með sambærilega menntun. Flótti hefur verið úr stéttinni og nýliðun ekki nægileg. Fjöldauppsagnir eru í farvatninu og líðan og öryggi fæðandi kvenna því í uppnámi.Ljósmæður þjónusta konur og börn á mikilvægustu augnablikum lífsins. Launakjör þeirra eru til marks um að hvorki þarfir né störf kvenna séu metin að verðleikum. Í stefnuyfirlýsingu ríkisstjórnarinnar er því lofað að kjör kvenna hjá hinu opinbera verði endurmetin, einkum hjá þeim stéttum þar sem konur eru í miklum meirihluta. Ljósmæður eru eingöngu konur.Öll höfum við fæðst. Stöndum nú með konunum sem stóðu með mæðrum okkar. Samstaða við stjórnarráðið þriðjudaginn 8. júlí, kl. 9.30.

2008-06-28T13:39:00.005Z

Ég kann ekki að búa sólarlöndum. He-man fékk sólsting sem skrifast eingöngu á hugsunarleysi mitt. Geimgengill er hins vegar ekki í neinni hættu á að fá sólsting þar sem þess er vandlega gætt að geislar sólarinnar nái ekki að skína á viðkvæma ungbarnshúð. Hann fær því ekki neitt D-vítamín þaðan. Hann ætlar því að vera duglegur að taka D-vítamín dropana sem eru að koma á markað enda ekki annað hægt þegar hann er fyrirsæta í kynningarbæklingnum fyrir dropana.

Hér er Geimgengill D-vítamínbarn

og stóri bróðir hans.

Takk fyrir öll kommentin við síðustu færslu :)

2008-06-15T10:33:00.002Z

Jæja. Ég veit varla hvar ég á að byrja.

Börnin dafna vel. Sá yngsti er tveimur staðalfrávikum fyrir ofan meðallag í hæð og þyngd og sjálfsagt fleiri staðalfrávikum ofar meðalbörnum hvað varðar hárprýði, geðprýði og fegurð. Bróðir hans er kominn á hrakfallabálks-aldurinn þar sem lífsgleðin er svo mikil að hann gleymir að horfa fram fyrir sig þegar hann hleypur um í gleði sinni og er farinn að reyna ýmsar jafnvægisæfingar sem geta endað með skrámum og marblettum. Unglingsstúlkan lauk 9. bekk með glans, fékk fínar einkunnir bæði í grunnskólanum og tónlistarskólanum. Hún er byrjuð að vinna í Krónunni. Fyrsti dagurinn var hörmung en annar dagurinn miklu betri, svona er aðlögunarhæfnin góð í minni ætt.

Skröggur sigldi til Færeyja en við börnin héldum til á Héraði á meðan. Þar gerði ég ekkert nema hekla dúk og hugsa um börnin mín, fara í snyrtingu og liggja í leti.

Svo liðu dagarnir, Skröggur kom heim í tæka tíð fyrir útskriftina mína sem var í gær. Ritgerðin mín hitti í mark því ég fékk tvenn verðlaun fyrir hana. Það þýðir að ég ætti ekki að verða í vandræðum með að afla styrkja til að gefa út foreldraritið mitt.

En næstu skriftir verða saga handa Soffíu sem ætlar að gefa út bók með reynslusögum um brjóstagjöf. Hún er núna að safna sögum í bókina og ég skora á ykkur að senda henni sögur!

2008-05-23T09:38:00.002Z

23. maí.

2008-05-17T10:32:00.003Z

Ég hef komist að því að það hentar mér betur að eignast barn í nóvember heldur en í apríl. Á veturna fer ég hiklaust í úlpu, húfu, trefil, vettlinga og ullarsokka áður en ég fer út. En núna er ég í mestu vandræðum með að klæða mig til útivistar. Ég stikna ef ég fer í úlpu, en það er ekki nógu hlýtt til að vera á peysunni. Ég fékk illsku í mjólkurbúið í annað skiptið á þessu mjaltatímabili og það er bara af því ég gleymi að passa mig þegar ég er úti í sól og "sumaryl". Svo í dag verð ég að vera inni og passa á mér júgrin.

Ég er að venjast því að vera búin í skólanum. Ég var virkilega fegin að klára en er búin að vera undarlega eirðarlaus og óskipulögð síðan. Eins og heilinn hafi brætt úr sér eftir allt þetta hugs undanfarið.

bzzt.

2008-05-08T17:27:00.000Z

Loksins komin í fæðingarorlof... jibbí :)

2008-05-05T10:43:00.002Z

Svona sefur litla ljósið fallega á meðan mamman er að læra (eða eyða dýrmætum tíma í vitleysu).

2008-05-03T15:07:00.002Z

Daginn sem litli ljósgeislinn varð mánaðargamall fór hann í strætó með mömmu sinni og skilaði lokaritgerð. Eftir tæpa viku förum við aftur í skólann að skila síðasta verkefninu. Og þá loksins fær hann alla þá athygli sem hann á skilið.

Draumabarnið sem hann er.

2008-04-20T09:20:00.002Z

Ég var að fara að setja síðasta punktinn í lokaverkefnið mitt sem er upplýsingarit fyrir foreldra barna með einhverfu þegar ég rak augun í frétt um að Umsjónarfélagið væri að gefa félagsmönnum bókina Einhverfa -spurt og svarað sem er nýkomin út.

Ég er ekki frumkvöðull lengur búhú.

Annars hef ég engan tíma til að blogga, líf mitt skiptist bróðurlega á milli litla átvaglsins og skólans og annað situr meira og minna á hakanum. Þar til einhverntímann í maí...

2008-04-04T11:21:00.002Z

2008-04-02T14:50:00.003Z

Öppdeit...

Í dag er ég búin að fá dásamlegt fótanudd frá verðandi doulu, góðan félagskap, nál í hausinn og á handarbökin og er komin með 4-5 í útvíkkun :)

Lífið er dásamlegt...

2008-04-02T08:05:00.002Z

Nei 1. apríl var ekki dagurinn.
En 2. apríl stendur enn til boða, svona ef kona ætlar að vera óhóflega bjartsýn...
Það er afmælisdagur sem allir sem kunna margföldunartöfluna geta munað:

02.04.08 --> 2 x 4 = 8

2008-03-31T18:23:00.003Z

Enn er allt með kyrrum kjörum. Aftur reynt að hreyfa við belgnum í morgun en það gekk ekki. Fer á miðvikudaginn í monitor og mat á meðgöngudeild (hvað eru mörg "m" í því?) og svo verður reynt að koma fæðingu af stað á föstudaginn ef ég verð ekki orðin léttari þá.
Ég sé allavega fyrir endann á meðgöngunni í þessari viku :)

2008-03-30T19:24:00.002Z

Í upphafi meðgöngu skráði ég mig á vefsíðu sem sendi mér upplýsingar um fósturþroska viku eftir viku. Í dag fékk ég póst frá þessari síðu þar sem mér var óskað til hamingju með vikugamalt barn mitt...

Ég held að ég sé farin að hallast að kenningu Sunnu um að barnið verði aprílgabb.

2008-03-29T18:31:00.002Z

Við erum sko búin að fatta hvað tefur barnið. Það er ekki búið að finna á það nafn. Við Skröggur vorum eins og persónur úr sagnfræðitrylli þar sem við hlupum inn á bókasafnið fimm mínútur yfir fimm, laumuðum okkur í lyftuna og upp á þriðju hæð. Þar vorum við stöðvuð af ákveðnum bókaverði sem bannaði okkur að fara lengra. En það stöðvar enginn litla konu með bumbu svo á endanum hlupum við út með Nöfn Íslendinga í fanginu rétt áður en skellt var í lás.

Ansi væri þægilegt ef börnin kæmu merkt með nafni í heiminn...

2008-03-28T17:45:00.002Z

Í dag er ég búin að fara í mónitor, drekka hindberjalaufste í lítravís og þramma upp og niður Bankastræti og Skólavörðustíg. En ég held að ég sé ekkert á leiðinni á fæðingardeildina í dag.

2008-03-27T21:29:00.000Z

Nix... ekkert að gerast. Annars allt fínt bara...

2008-03-26T12:32:00.002Z

Fór í skoðun. Er orðin 75 kg - úff. Bumbi unir hag sínum vel og er fátt sem bendir til þess að hann sé rétt ókominn. Það veit ég vegna þess að ljósmóðirin gerði tilraun til að hreyfa við belgnum en náði varla í hann. Það þýðir að þótt unginn sé skorðaður er hann ekki kominn eins langt niður í grindina og við héldum og í stað þess að vera með ca 4 í útvíkkun eins og mætti búast við af kerlingu sem gengur með fjórða barn og er komin fram yfir 40 vikur er útvíkkunin bara 1-2.

En það eru allir hraustir og þá er nú varla yfir neinu að kvarta... reyni að hafa hemil á óþolinmæðinni og geðvonskunni.

Takk fyrir góðar kveðjur :-)

2008-03-25T12:07:00.000Z

Það eru engar fréttir.

2008-03-22T11:38:00.003Z

Dularfullt atvik átti sér stað aðfaranótt föstudagsins langa. Þá hvarf fuglinn Kermit sporlaust af heiminu. Mikið vona ég að hún hafi flogið út um gluggann. Og mikið sakna ég þessa litla fyglis sem hefur fylgt okkur í næstum fjögur ár.

Annars er ekkert fréttnæmt héðan, það er bara legið í Ísfólkinu og beðið eftir að yngsta syninum þóknist að koma í heiminn.

2008-03-19T21:52:00.002Z

Eftir að hafa skilað lokaverkefninu hef ég varla nennt að læra neitt. Síðan á mánudaginn er ég búin að fara tvær ferðir á bókasafnið og ná mér í Ísfólksbækur. Búin með 6 bækur. Skröggur hefur áhyggjur af geðheilsu minni, bæði vegna Ísfólksins og líka þess að nú veit hann að ég vil helst ekki missa af Glæstum vonum og Nágrönnum.

He-man föndraði páskaunga í leikskólanum. Það fyrsta sem hann gerði þegar hann kom heim var að troða unganum inn í fuglabúrið... auðvitað á að geyma bíbí í fuglabúrinu :-)

Jæja ég nenni þessu ekki meir. Barnið má fara að koma.

2008-03-16T20:56:00.002Z

Svei mér þá. Stundum tekst mér það sem ég ætla mér. Lokaverkefnið mitt er semsagt tilbúið til yfirlestrar hjá leiðbeinanda og ég ætla að skila því á morgun. Og enn eru 9 dagar eftir af 40 vikunum. Kannski næ ég að klára fullt meira áður en barnið kemur. Að minnsta kosti skal ég komast í hársnyrtinguna mína á morgun.
Grísastelpa er komin til okkar í páskafrí og það er gaman. Svo gaman að hún fær prinsessumeðferð þannig að ég er ekki ennþá farin að láta hana taka úr uppþvottavélinni. Skröggur er líka kominn í páskafrí í vinnunni. Aumingja hann að þurfa að umgangast mig svona mikið á næstunni. Ég er nefnilega komin með einhvers konar fullkomnunaráráttu sem gerir Skrögg að fórnarlambi því ég er allt of feit til að geta gert hlutina sjálf.

2008-03-11T12:16:00.002Z

Bleyjublæti komið af stað aftur...

Hvað verða þessar sætar á litla bossanum...

2008-03-07T22:37:00.002Z

Ég er ólýsanlega fegin að hafa verið búin að taka hringinn af fingrinum á mér áður en hendurnar mínar breyttust í skrímsli með pylsuputta. Ég er allt í einu orðin vel ólétt. En það er nú allt í lagi, það er ekki langt eftir svo ég hlýt að geta afborið þessa afskræmingu í nokkrar vikur í viðbót. Eftir mánudaginn þarf ég ekki einu sinni að fara út úr húsi nema í eftirlit svo sama er mér þótt ég líti út eins og mislukkað bjúga.
Bumbi er orðinn 12 merkur samkvæmt sónar og er fastskorðaður. Það er allt tilbúið fyrir hann nema sængin sem ég á eftir að þvo. Það geri ég líklega á morgun. Ég hlakka mikið til að hitta hann og sveiflast á milli þess að vilja fá hann strax eða að ná að klára BA verkefnið fyrst. Ég skal klára verkefnið í næstu viku...
Ég er búin að lesa fæðingarbækurnar hennar Ynju svo oft að ég er hætt að fá sting þegar ég hugsa um fæðinguna. Ég er komin í keppnisskap og spila til að vinna. Í staðinn fyrir bikar fæ ég spriklandi og organdi kríli í fangið.

Það má alveg koma í heimsókn þótt ég sé að ritgerðast... fer að verða síðasti séns að sjá mig ólétta ef einhver hefur áhuga á því :)

2008-03-03T15:02:00.002Z

"Takk fyrir mamma" sagði He-man þegar ég rétti honum eplabát. Svo sætur :)

2008-02-14T21:43:00.002Z

Ég blæs hraðar út en BA verkefnið mitt. Á morgun hef ég heilan dag til að liggja yfir því svo seinnipartinn í dag hef ég reynt að hvíla setvöðvana.

Heyrði í kátri stelpu sem fór með bassann minn austur á land á sunndudaginn og byrjar í bassatímum í næstu viku. Hún framkvæmir það sem mig dreymdi um á hennar aldri. Það er ekkert nema frábært. Kennarinn hennar var nemandi minn í grunnskóla þegar hann var níu eða tíu ára gamall. En ég er samt ung...

2008-02-04T22:08:00.000Z

Þarna er Bah-buh í nátttreyju með mynd af babú. Finnst einhverjum hann þurfa að fara í klippingu? :-D

2008-01-31T20:41:00.000Z

Gríshildur situr við tölvuna og pikkar.

Skröggur: Pikk pikk pikk. Þú hefur verið að læra síðan ég kynntist þér.
Gríshildur: Já en bráðum verð ég búin. Heldurðu að ég verði ekki bara eitthvað skrítin þá?
Skröggur: Þú verður bara að finna þér eitthvað áhugamál.
Gríshildur: Kannski fæ ég áhuga á ritstörfum og held áfram að pikka.
Skröggur: Eða ferð kannski að elda og þrífa.

2008-01-26T14:12:00.000Z

Bumb.

Ég hef ekki mikið skrifað um núverandi óléttu. Kannski er kona ekki eins upptekin af fjórðu bumbunni sinni eins og þeim fyrri þar sem engin nýlunda er á ferð. Eða kannski er kona of upptekin við dagleg störf til að geta dreymt dagdrauma um lífið með nýju barni.

Nú eru bara rúmar átta vikur eftir ef drengurinn fylgir í fótspor bræðra sinna og kemur degi eftir setta dagsetningu. Þessi litli bumbi vill sviðasultu og feitan ost. Eitthvað sem ég hélt að ég myndi aldrei borða með góðri lyst. Hann vill líka te með hunangi. Hann snýr rétt og er duglegur að sprikla og pota. Og hann potar oft í mig svo ég haldi mig að verki með lokaverkefnið. Það skal verða tilbúið til yfirlestrar áður en hann kemur í heiminn svo við getum átt tíma saman án truflunar. Því er það þannig að þegar ég horfi á baby tickerinn á síðunni minni hugsa ég um tvö erfið verkefni sem bíða mín. Að koma barni hraustu í heiminn og skila sómasamlegu BA verkefni.

Þegar ég er ekki að lesa í kringum BA verkefnið les ég bækur um fæðingu sem Ynja var svo góð að lána mér. Ég man allt of vel eftir síðustu fæðingu, held að endorfínið hafi eitthvað klikkað. Þegar ég les um hríðir man ég fullkomlega að ég hélt að ég myndi drepast úr sársauka. Nú verð ég viðbúin. Kannski verð ég búin að pína mig svo mikið af ímynduðum sársauka að fæðingin sjálf verður leikur einn.

Já þetta verður svo auðvelt að ég get skrifað lokaorðin í ritgerðinni með átta í útvíkkun...

2008-01-18T09:07:00.000Z

Í morgun kl. 8:30 byrjaði ég opinberlega að vinna í BA verkefninu mínu.
Og ég er ekki enn komin með móðursýkiskast.

2008-01-13T10:36:00.000Z

Tannlæknirinn sá aumur á mér og tróð mér í skoðun í hádeginu á föstudaginn. Það var ekkert athugavert við tennurnar á mér en ef ég yrði ekki skárri eftir helgina væri hugsanlegt að það þyrfti að rótarfylla tönn. Klukkan fimm fór ég að grenja og dreif mig upp á heilsugæslustöð til að athuga hvort ég mætti éta eitthvað kraftmeira en paratabs. Ég fékk sýklalyf og risapakka af parkódín. Hef ekki grenjað síðan og er vongóð um að það verði ekkert af rótarfyllingu.
Líklega hef ég lent í árás sýkla sem hreiðruðu um sig í kinnholu minni. Þeir urðu að finna upp á einhverju nýju fyrst ég hrindi af mér öllum umgangspestum.

Þar sem ég er mest búin að sitja og liggja í aumingjaskap af völdum meintra sýkla er grindverkur í sögulegu hámarki og ef ég get staulast í vinnuna á morgun þarf ég varla vottorð til að sýna fram á skerta starfsgetu.

En á meðan ég hef legið í kör er búið að sparsla og mála svefnherbergið og í þessum skrifuðu orðum eru Skröggur og pabbi hans að leggja parketið. He-man fór í blak með ömmu sinni og ég er að hvíla lúin bein eftir að hafa tekið niður restina af jólaskrautinu.

Grísastelpan fór eftir áramót austur í sveitasæluna til ömmu og afa. Hún ætlar að klára grunnskólann þar í notalegra umhverfi en gagnfræðaskólar höfuðborgarsvæðisins bjóða upp á.
Nú er ég í miklum samningaviðræðum við Bumba um að hann megi ekki koma fyrr en ég er búin með vettvangsnámið en hann verði samt að koma áður en Grísastelpa fer aftur austur úr páskafríinu. Hann er að hugsa málið.

Ég þarf að fara að byrja á BA verkefninu mínu. Ég er allavega byrjuð að hugsa um það... og búa til grind. Þarf að drífa mig að komast í samband við heppilega foreldra til að taka viðtal við. Þegar ég er búin með viðtölin er mér ekkert að vanbúnaði að skrifa eins og vindurinn. Ótrúlegt að þetta sé síðasta önnin. Ég skal útskrifast í vor!

2008-01-11T03:53:00.000Z

Það gefst ekki oft tími til að setjast niður og blogga. En núna hef ég svosem ekkert betra að gera á meðan ég bíð eftir að verkjalyfin virki á tannpínuna sem heldur fyrir mér vöku um miðja nótt. Ólétta og tannpína fara einstaklega illa saman því óléttar konur mega víst ekki hakka í sig hvaða pillur sem er.

Á morgun er síðasti forstöðumannsdagurinn minn. Eftir það verð ég bara deildarstjóri aftur. Þá verður sólarhringsábyrgð aflétt af herðum mínum. Sem betur fer því grindverkur ágerst með hverjum deginum og ég þarf að fara að minnka við mig vinnuna. Annars gekk þetta allt ljómandi vel þrátt fyrir viðvarandi starfsmannaeklu. En það er sko ekki mér að þakka heldur duglegu konunum sem standa vaktirnar.

Bumbi dafnar vel og dundar sér við að pota í rifbeinin mín með hælunum. Hreiðurgerðaráráttan er að gera vart við sig því nú ætlum við að taka svefnherbergið okkar í gegn, mála, setja nýtt gólfefni og kaupa nýja fataskápa. Með breytingunni verður til meira pláss fyrir rimlarúm, skiptiborð og kommóðu undir krílaföt.

He-man fer á kostum þessa dagana því hann virðist hafa fengið málið í jólagjöf. Það eru þó ekki allir sem skilja hvað hann meinar þegar hann segir til dæmis "stór húfa hahahæ". En það þýðir á fullorðinsmáli "Eyrnastór er með jólasveinahúfu". Á jólaballi um daginn heyrðist hópur barna hrópa á jólasveininn. Allir nema einn kölluðu "jólasveeeeiiiinnnn". Þessi eini kallaði "hahahææææ".
Ég vildi að tíminn myndi stoppa aðeins (ekki samt á meðan ég er með tannpínu) svo ég hefði meiri tíma til að njóta þess að eiga þennan litla strák og festa í minninu allt sem mér finnst svo dásamlegt við hann.

Paratabs kikkar inn og ég ætla að reyna að klára að sofa...

2007-12-30T21:42:00.000Z

Eftir að ég hóf búskap með Skröggi hef ég verið bitur milli jóla og nýárs. Þá hefur hann nefnilega engan tíma fyrir fjölskylduna sína vegna þess að hann selur flugelda frá morgni til kvölds. Og alltaf segist ég ætla að fara austur á næsta ári til að þurfa ekki að svekkja mig á þessu. En man svo ekkert eftir yfirlýsingunni fyrr en ég er alveg að snappa 30. des.

2007-12-24T09:32:00.000Z

Gleðileg jól kæru vinir, nær og fjær :)

Kveðja, Gríshildur og fjölskylda.

2007-12-20T21:23:00.001Z

Þar sem að ég verð heima með hlaupabólukarlinum mínum á morgun er ég komin í margra daga jólafrí. Svo framarlega sem ekkert kemur upp á í vinnunni.

Bóluman fór í matarsódabað og á eftir reyndi ég að maka á hann hvítu AD kremi. Honum leist nú ekki vel á það, jafnvel þótt ég tæki stóra slummu af kreminu og setti á nefið á mér til að sýna að þetta væri nú bara gaman... en þetta hafðist að lokum.

Við kúrðum í sófanum en vorum trufluð af póstinum sem kom með jólapakka. Svo voru tennur burstaðar og sá stutti lagðist þægur í rúmið og steinsofnaði. Stuttu síðar fór mig að klæja í nefbroddinn og mundi þá eftir kremklessunni. Og fattaði hvers vegna pósturinn horfði svona undarlega á mig...

2007-12-12T21:16:00.001Z

Prentarinn er að spýta út úr sér 42 blaðsíðum af síðasta verkefninu á þessu ári. Jess!
Og bumbi stækkaði allt í einu svo mikið að ég er komin með eilífðar brjóstsviða. Enda bara 15 vikur þar til hann mætir á svæðið ef ég reikna rétt. Sveimérþá.

2007-12-10T10:44:00.000Z

Það sem gerist þegar maður bíður í fimm klukkutíma eftir þjónustu á slysó er að maður fær óstjórnlegan áhuga á golfi. Eða það mætti halda það miðað við lesefnið sem er í boði á innri biðstofunni.
Slysavarnarmaðurinn Skröggur prílaði upp í stiga í fljúgandi hálku til að setja upp jólaseríur á bílskúrinn. Svo heyrðist brauk og braml. Og svo fórum við á slysó þar sem ég er ekki nógu góð saumakona og þoli ekki blóð. Og biðum og biðum. Á meðan greri fyrir sárið og nefið á Skröggi festist út á hlið. Og mér leiddist svo mikið að ég fékk áhuga á golfi.

2007-11-29T21:34:00.000Z

Í dag eru tvö ár síðan snúðurinn hann He-man kom í heiminn. Hann skaut okkur skelk í bringu með því að vera blár og slappur fyrstu mínúturnar en hann var sem betur fer fljótur að ná sér og útskrifaðist af vökudeild eftir að hafa verið þar undir eftirliti í klukkutíma. Fyrst leit hann út eins og lítið lukkutröll með mikið hár sem stóð beint út í loftið og þrefalda undirhöku af velsæld. Við biðum spennt eftir fyrsta brosinu hans og þegar það loksins kom var það ekki sparað. Svo hófust alls konar líkamsæfingar og hljóðprufur. Hann var samt ekkert að flýta sér að hlutunum, byrjaði t.d. ekki að ganga fyrr en um 13-14 mánaða. Núna hleypur hann um allt og hefur ótrúlegt úthald. Svo fannst honum ástæðulaust að vera blaðrandi út í eitt þar til nú fyrir skemmstu. Þessa dagana bætast við ný orð á hverjum degi og hann kemur stöðugt á óvart með orðaforðanum.

Á hverjum degi gleðst ég yfir litla skrítna strákgorminum mínum. Svo ég gerist nú væmnust í Vesturbænum þá kom hann til okkar sem ljós í myrkri...

2007-11-19T21:50:00.000Z

Ég er að gera verkefni um mannauðsstjórnun.
Ekki eru allir sammála um ágæti mannauðsstjórnunarkenninga. T.d. hefur þeim verið lýst sem bjartsýnishjali og skrumi. Það aftrar þó ekki höfundi bókarinnar Human Resource Management Practice að skrifa 1000 blaðsíðna bók um efnið...

2007-11-17T22:35:00.000Z

Tilfinningakreppa er liðin hjá og ég er aftur orðin hin súpersvala Gríshildur sem lætur ekkert á sig fá. Annir fara minnkandi með hverju verki sem ég lýk. Í dag tókst mér t.d. að ljúka verkefni C í Stjórnsýslu í opinberri þjónustu. Þegar ég verð búin með verkefni D þarf ég ekki að hugsa meira um þann pakka. Verkefni 2 í kúrsinum sem ég man aldrei hvað heitir er í vinnslu. Verð orðin sérfræðingur í mannréttindum, lögum og reglugerðum um málefni fatlaðra þegar því lýkur. Eins og oft vill verða fæ ég ógeð á því sem ég þarf að gera þegar mig langar að gera eitthvað annað og fer því á endanum ógeð á mannréttindum, lögum og reglugerðum og íslenska velferðarkerfinu. Gaman að þessu.

2007-11-15T21:12:00.000Z

Ég er á haus.
Og í tilfinningalegri kreppu.
Verð að fresta kreppu vegna anna.
Verð að fresta önnum vegna þess að ég verð að komast í sturtu.
Púff.

2007-11-09T22:11:00.000Z

Í þessari viku var ég ofurkona í 100% vinnu og 100% námi. Með risastórt samviskubit yfir vanrækslu á afkvæmunum. Skröggur var ofurhúsfaðir með 100% eldamennsku og 100% uppvask auk þess að vera ofurpabbi. Í kvöld erum við bæði úrvinda.

Dugfús Bambi er væntanlegur 25. mars.

2007-10-27T12:24:00.001Z

Fyrsta vettvangsferð leikskóladrengsins

Það er víst séríslenskt fyrirbæri að láta börn halda í band í gönguferðum og þetta er vinsælt myndefni hjá túristum. Börnin vanda sig mikið við að halda í bandið og ef þau detta dragast þau frekar áfram en að sleppa bandinu. Þarna er völlur á mínum, eina myndin af honum þar sem hann var ekki með skeifu í gönguferðinni. Skeifan hlýtur að hafa komið í kjölfar þess að hann fékk ekki að sleppa bandinu til að taka upp einhverja gersemi sem hann er að benda á á þessari mynd...

2007-10-24T21:18:00.000Z

Það er nú auma starfið að vera forstöðumaður. Sérstaklega þegar vantar þrjár manneskjur upp á að mönnunarþörf sé fullnægt og engar umsóknir berast. Fyrir utan umsókn frá Ísrael þar sem maður nokkur sagðist hafa áhuga á að vinna við bílaviðgerðir eða umönnun aldraðara. Ég tel niður dagana til áramóta...

Bumbusundið er út úr kortinu ennþá en ég ætla að fjárfesta í meðgöngubelti og fá lánaðan stóran bolta til að sitja á. Í dag var álag í vinnunni og ég hugsaði með mér að þessir grindverkir væru bara ímyndun og aumingjaskapur í mér, afsökun fyrir að vera löt. Svo ég dreif mig í að mata, spelka, lyfta, klæða og skipta á. Í kvöld er ég sannfærð um að ég er ekki með ímyndunargrindverk. Og ég hugsa með söknuði til síðustu meðgöngu þar sem ég var bara að vinna og ala upp ungling. Hafði nógan tíma til að vera ólétt, fara í bumbusund og lesa allar meðgöngusíður og bækur í heimi.

En það styttist í áramótin :)

2007-10-16T21:46:00.000Z

Ansi var nú gaman í dag þegar He-man varð skyndilega veikur inni á veitingastað og ældi yfir sig allan. Sem betur fer vorum við bara á macdonalds. Þá rámaði mig í grein í blaðinu um daginn þar sem var sagt frá alls kyns óbjóði sem leynist í mat á skyndibitastöðum. Varð þá nokkuð fegin að uppgötva að stubburinn var kominn með hita. Mun skárra að fá alvöru pest en matareitrun af saurgerlum frá macdonalds.

Er búin að vera að brasast í að búa til starfskenningu. Það gengur ekki vel því ég er svo neikvæð. Ég ætti að útskrifast sem and-þroskaþjálfi ef ég þá næ einhverntímann að útskrifast úr þessu námi.

2007-10-15T21:36:00.000Z

Í staðinn fyrir að vinna í verkefninu sem ég þarf að skila bráðum dundaði ég mér við að setja nýja óléttumælistiku á síðuna. Bara fyrir Mörtu sem nennti ekki að reikna út vikurnar :)

Það er svo mikið að gera hjá mér að ég hef varla tíma til að vera ólétt. Er orðin grindarglyðra en hef ekki tíma til að gera neitt í því. Hleyp ekki úr vinnunni til að fara í meðgöngusundið, a.m.k. á meðan ég á eftir að klára rekstraráætlunina og ráða í lausar stöður. Ekki fer ég á kvöldin því þá þykist ég ætla að læra. Kosturinn við þetta annríki er að ég hef ekki tíma til að telja niður dagana þar til barnið fæðist. Ég taldi sekúndurnar þegar ég gekk með He-man enda gekk ég með hann í heila öld. En þessar tæpu 17 vikur sem eru liðnar af meðgöngunni leyna sér ekki. Ég er komin með bumbu sem passar vel í nýju óléttubuxurnar mínar. Verst að lappirnar passa ekki jafn vel í skálmarnar.

He-man átti góðan sprett í gær. Mamman hélt að hann væri hjá pabbanum og öfugt. Á meðan hann fékk frið dundaði sá litli sér við að tína drasl úr ruslafötunni inni á baði og henda því í klósettið. Voða duglegur :)

Það er gaman að eiga lítinn grallaraspóa. Hvernig verður að eiga tvo?

2007-10-06T14:10:00.000Z

Hjúkkitt að það er bara laugardagur. Ég get lært á morgun líka...
Mér líður eins og mesta úrhraki. Búin að mæta stopult í vinnuna alla síðustu viku vegna veikinda He-mans. Varla byrjuð á verkefni sem ég þarf að skila of fljótlega. Ekki búin að taka niður af þvottasnúrunni, úr þurrkaranum né þvottavélinni. Og þótt ég sé varla að gera neitt þakkaði ég fyrir að hafa tíma til að fara í sturtu.
Og þroskaheftir eru byrjaðir að læra þroskaþjálfun upp í Kennó. Why bother?

2007-09-30T12:19:00.000Z

Ótrúlegt hvað ég er orðin framsett miðað við hvað þetta er lítið ennþá... kannski ét ég bara of mikið.

2007-09-27T23:00:00.000Z

Í dag gerðist þrennt óvenjulegt.
Byrjaði með því að það var fullmannað í vinnunni þannig að ég gat sinnt skrifstofustörfunum almennilega í fyrsta skipti síðan ég tók við forstöðunni.
Þegar ég var komin heim birtist Skröggur með nýja tölvu handa mér. (Í gærkvöldi var ég brjáluð því hann tók tölvuna mína traustataki og fór með hana niður í björgunarstöð en ég ætlaði að nota hana til lærdóms... hann ætlar ekki að eiga svona bræðiskast á hættu aftur!)
Í kvöld fórum við svo að horfa á módelkeppni! (Litla mágkona mín var að keppa svo það var skyldumæting). Ég er enn í menningarsjokki eftir áhorfið... en hlæ illkvittnislega innra með mér vegna þess að aðgangseyririnn rann í sjóð átröskunarsamtaka, en hver skyldi hafa unnið? Eina stelpan sem leit virkilega út fyrir að vera haldin anorexíu.

Og svo er nú eiginlega fjórða atriðið komið, klukkan er að ganga tólf og ég er ekki sofnuð.
Góða nótt !

2007-09-10T15:44:00.000Z

Í fréttum er þetta helst:

2007-09-02T21:35:00.000Z

Ég er að fá felmturskast. Námskeiðslýsingin í þroskaþjálfafræði og vinnubrögðum II og vettvangsnám - heildræn þjónusta er átta blaðsíður af verkefnalýsingum. Hvernig á ég að komast í gegnum þetta? Ég skil ekki einu sinni öll orðin þarna. "Fjallað er um faglegt hlutverk þroskaþjálfa við þróun, skipulagningu og útfærslu heildrænnar og fjölþættrar þjónustu sem tekur mið af opinberum kröfum um gæði og faglegu sjónarmiði fagstéttarinnar og svarar einstaklingsbundum þörfum hins fatlaða." Ég skil ekki stakt orð í þessu. Enda er orðaforðinn sjálfsagt orðinn ansi takmarkaður af því að vinna hálfan daginn með fólki sem notar "óhefðbundnar tjáskiptaleiðir" og eyða restinni með tæplega tveggja ára barni og unglingi sem talar sem minnst við fullorðna.
Skröggur kom heim um helgina en hann gat ekki málörvað mig mikið því ég var svo þreytt eftir fjarveru hans að ég bara svaf...

jájá þetta er meme.

2007-08-20T22:27:00.000Z

Alvara lífsins hefst á ný. Skröggur farinn um borð í skipið sitt og ég þarf að finna ofurkraftinn til að höndla heimilishald og uppeldi óstudd auk þess að sinna vinnu og skólanum sem fer á fullt í næstu viku.

Við He-man fylgdum sjóaranum í flug. Skröggur og He-man horfðu á flugvélar út um gluggann og ég fékk það hlutskipti að halda á glænýju skærappelsínugulu björgunarvesti sem komst ekki í ferðatösku Skröggs. Svo flissaði ég fíflalega þegar ég hugsaði um að allir væru að glápa á mig af því ég væri flughrædda konan sem færi með sitt eigið björgunarvesti í flug... Svo hló ég ennþá meira á leiðinni út í bíl þegar ég hugsaði um Skrögg sitjandi í fokkernum með björgunarvestið í fanginu.

2007-08-16T20:31:00.000Z

Búin í sumarfríi og búin að flytja.
Bráðum uppfærist ég úr deildarstjóra í forstöðumann. En sem betur fer verð ég bara svoleiðis í þrjá mánuði. Lendi samt í því að þurfa að gera rekstraráætlun og starfsáætlun sem þarf að skila á sama tíma og mesta álagið er í skólanum fyrir jólin. Og miðað við umfjöllun fjölmiðla um sukk í ríkisrekstri verð ég örugglega svo heltekin af þessum áætlunum að ég fell í skólanum. Nema kannski í mannauðsstjórnunarkúrsinum, ég er auðvitað alveg snillingur í að stjórna mannauði, allavega finnst ekki kátara og klárara starfsfólk en á vinnustaðnum mínum. Og það er örugglega bara mér að þakka...

I-ið er að detta af lyklaborðinu svo ég nenni ekki að blogga meira fyrr en ég er búin að laga það eða kaupa nýja tölvu. Allt fínt að frétta annars.

2007-07-22T22:24:00.000Z

Síðan ég kom heim frá Englandi er ég búin að ferðast hringinn í kringum Ísland með góðri viðkomu í Fellabænum. Nú er ég að fara að flytja. Þar til ég hef tíma til að blogga getið þið skemmt ykkur við þetta.

2007-07-13T08:00:00.000Z

I dag er sidasti dagurinn i Manchester, a morgun forum vid til London. Unglingurinn hefur krafist thess ad fa ad sofa ut en vid Ragna thurfum ad fara i baeinn ad borga lestarmidana. Krakkanum er svosem sama thott hann verdi einn heima i dag thvi i gaer var keyptur nyr ipod og her i husinu a Kings Road eru til oteljandi spennandi geisladiskar sem tharf ad hlada inn a ipodinn.
I gaer forum vid a tattoo og piercing stofu thar sem barnid baetti vid sig einu gati, bara i eyrad samt! Svo bordudum vid a munkastadnum sem eg hef saknad sidan eg var herna sidast. Einhverjar budir urdu a vegi okkar adur en vid thurftum a drifa okkur til ad kaupa regnhlifar thvi thad byrjadi ad hellirigna. Vid bordudum kvoldverd a Hard Rock og skelltum okkur svo i bio ad sja Harry Potter og Fonixregluna. Thad var alveg stappad i bio og ordid mjog heitt og loftlaust eftir sma stund. Vid hlidina a mer satu italskir strakar sem voru endalaust ad tauta eitthvad vid hvorn annan. Thar fyrir utan var thetta ljomandi alveg. Serstaklega thar sem hallinn i salnum var svo godur ad eg hefdi vel getad sed yfir hofudid a risa. Mjog hentugt fyrir dverga eins og mig.

2007-07-11T19:08:00.000Z

I dag forum vid i risastort goth voruhus og ollum ad ovorum gekk unglingurinn ut med adeins eitt pils. Hun er semsagt ekki goth lengur... Vid thraeddum lika plotubudir a Oldham Street og thar var baett i black metal safnid. Eg a fullt af pening til ad eyda en finn ekkert til ad kaupa... alltaf thannig! Er samt buin ad kaupa einar buxur, tvaer thattaradir byggdar a bokum Jane Austen og matarsoda. Vid Grisla tokum straeto eins og vid seum innfaeddar og hofum ekki enn tynst i storborginni thott Skroggur se heima med ratvisina.

Eg vildi ad thad vaeri Unicorn bud a Seltjarnarnesi.

2007-07-10T07:04:00.000Z

Trains, plains and automobiles gaeti verid agaetis fyrirsogn a thessu bloggi. I gaer eyddi eg 50 minutum i rutu, taepum 4 timum i flugvel (fyrir utan allan timann sem velin var stopp) og riflega 3 1/2 tima i lestum af ymsu tagi. Eg var ad fa gridarlegan moral yfir allri menguninni sem thetta ferdalag hefur i for med ser en sa mer til mikils lettis ad her er nog af trjam til ad kolefnisjafna mig.
Eg er ad sjalfsogdu voknud a minum islenska tima er bar eitthvad ad lufsast a medan adrir sofa. Thad er fint, gott ad slappa af og gera ekkert.
I dag aetlum vid ad fara i Chorlton thar sem er kjorbud sem selur bara lifraenan mat og fullt af kaffihusum og saetum litlum budum sem er gaman ad skoda. Svo thurfum vid Grisla ad laera a straeto herna... hjalp!

2007-07-07T22:27:00.000Z

Ég er komin í sumarfrí :)

2007-07-01T22:25:00.000Z

Sólbrennd og syfjuð svínka situr í sófa. Hvað eru mörg ess í því?

Ég er að bíða eftir að stóra barnið komi heim af tónleikum. Vona að mannætulíkin hafi ekki étið hana... hún þarf nefnilega að passa fyrir mig á miðvikudaginn.

Er búin að eiga dásamlega helgi með fjölskyldunni minni. Skröggur kom heim í helgarfrí eftir 12 daga útlegð. Eftir 4 daga er hann kominn í sumarfrí jibbí :) Ég fer í sumarfrí eftir viku og fer þá með fermingarbarningu í menningarreisu til Manchester og London.

Síðast þegar ég fór til Englands átti ég flug daginn eftir lesta- og strætósprengingarnar. Nú er aftur hámarksviðbúnaður vegna hugsanlegra hryðjuverka þar. Vona bara að þeir fari ekki að sprengja aftur í tube-inu helvískir eða gera nokkuð það sem getur klúðrað ferð okkar til Manchester via London.

Þegar við mæðgur komum heilar heim að utan verður haldið til Egilsstaða eystri. Þegar við höfum notið sveitasælunnar í nokkra daga flytjum við allt okkar hafurtask annars vegar í Sorpu og hins vegar í Egilsstaði syðri þar sem við munum reyna að búa lengur en þrjú ár :D

Nóg að gera í sumar. Það er gaman. Líka gaman að í gær sagði He-man "ís"skýrt og greinilega. Í dag er ég búin að troða í hann 3 lítrum af ís í von um að heyra orðið aftur en án árangurs. Ég þarf eitthvað að endurskoða þjálfunaraðferðir...

2007-06-21T22:30:00.001Z

Í dag fór ég á fasteignasöluna, skrifaði nafnið mitt á óteljandi pappíra og óteljandi sinnum og borgaði margar milljónir. Pappírssnepillinn Umboð var félagi minn í þessum kaupum þar sem maki minn Skröggur er norður í Rassgati að kenna. Ég vona að Umboð hafi tekið vel eftir því sem fram fór því ég var hálfsofandi yfir smáa letrinu sem var lesið frá orði til orðs eintóna röddu.

Þar sem ég er nú sjómannsekkja hefur He-man þurft að flakka meira á milli fólks en áður. Í þessari viku hefur hann farið jafn oft í pössun og síðasta árið. Hann er kominn með snert af áfallastreituröskun í kjölfarið og vaknar upp með látum til að athuga hvort mamman sé þarna nálægt. En plúsinn við þetta er að hann hefur loksins fundið ástæðu til að segja "mamma". Og var kominn tími til, barnið að verða 19 mánaða gamalt! Það er töluvert sætara að vera "mamma" en "koddu". Svo hef ég hvergi lesið að börn læri að jarma og mjálma áður en þau segja "mamma"... kannski ég ætti að endurskoða samskiptin á heimilinu!

2007-06-12T09:25:00.000Z

Þær eru nú ansi hressar þessar konur sem ég þarf að eiga samskipti við annars lagið. Þær vita rosalega mikið um bókhald, launamál og oracle.
Jamm...

2007-06-07T10:21:00.000Z

Það er ekki auðvelt að bera ábyrgð á heilum vinnustað.

Sérstaklega þegar maður þarf að segja við einhvern að það gæti verið betra að hann myndi vinna annarsstaðar.

Mér finnst ég vera svolítið svona:

2007-06-04T22:02:00.000Z

Þá er hann Skröggur minn sigldur burtu.

2007-06-01T21:53:00.000Z

Þessi mynd er tekin í síðasta partíi sem ég hélt. Það er svo langt síðan að ég man ekkert hvaða fólk þetta er.

Ef þú lesandi góður hefur upplýsingar um nöfn þeirra sem þarna eru endilega láttu mig vita svo ég geti skrifað þau í myndaalbúmið mitt.

2007-05-31T21:13:00.000Z

Var búin að sitja lengi yfir súru Alþingi og bíða eftir Desperate Housewives. Komst þá að því að kvensurnar fengu að víkja fyrir þessu fjasi. Grrr.

2007-05-27T22:39:00.000Z

Ég fíla hvítasunnuhelgina. Hún er hátíð sem færir manni aukafrídag án þess að maður þurfi að þrífa, kaupa gjafir eða skreyta sem fylgir oft svona dögum. Annars held ég að ég hafi alltaf verið á vakt á 2. í hvítasunnu. En ekki á morgun... því nú er ég svo hátt sett. Þegar ég mæti í vinnuna á þriðjudaginn verð ég forstöðukvendi. Úgg. Sem betur fer bara í þrjár vikur... það hlýtur að taka lengri tíma en það að klúðra vel reknu heimili?

Annars eru helstu tíðindin kaup og sala á húsnæði. Í sumar fæ ég bílskúr undir hljómsveitina sem ég á eftir að stofna. Ég fæ líka sjónvarpslausa stofu þar sem ég get sötrað sherry og horft til hafs. Lítinn garð sem verður girtur af og skreyttur með sandkassa og rennibraut... Ég er að verða argasta efnishyggjugeit. Svona ánægð geit:

2007-05-24T09:50:00.000Z

Ég og heilinn minn...

Varð að herma eftir Ronju og taka þetta próf :)

You're a Balanced-brained!

That means you are able to draw on the strengths of both the right and left hemispheres of your brain, depending upon a given situation. When you need to explain a complicated process to someone, or plan a detailed vacation, the left hemisphere of your brain, which is responsible for your ability to solve problems logically, might kick in. But if you were critiquing an art opening or coming up with an original way to file papers, the right side of your brain, which is responsible for noticing subtle details in things, might take over.

While many people have clearly dominant left- or right-brained tendencies, you are able to draw on skills from both hemispheres of your brain. This rare combination makes you a very creative and flexible thinker.

The down side to being balanced-brained is that you may sometimes feel paralyzed by indecision when the two hemispheres of your brain are competing to solve a problem in their own unique ways.

2007-05-23T09:12:00.000Z

14 - 3

Til hamingju börnin mín stór og smá, uppi og niðri...

2007-05-22T17:32:00.000Z

Þriggja punkta blogg

Í dag fékk ég innkaupakort ríkisins.
Fór svo á fasteignasölu og gerði tilboð í Egilsstaði.
Á morgun er stór dagur.

2007-05-15T11:44:00.000Z

Ég var víst búin að lofa sjálfri mér og öðrum að vera dugleg að blogga eftir vettvangsnámið...

Ég fékk flutning í vinnunni og er nú ekki lengur með geðveikum heldur fjölfötluðum ungmennum og vinn bara með konum. Enginn í vinnunni veit gsm símann minn og því er ég frjáls eftir að vinnudegi lýkur. Mikil breyting sem sagt.
Þessi sálmur lýsir starfinu ágætlega.

Lítill snúður vill eiga mömmu sína óskipta svo þetta verður að duga í bili :)

2007-05-05T22:34:00.000Z

Ég var að setja síðasta punktinn í síðasta verkefnið. Og það munar ekki miklu að ég felli tár. Ekki vegna þess að ég er svo fegin að vera búin með verkefnið heldur vegna þess að á mánudaginn fer ég í vinnuna í staðinn fyrir að fara á leikskólann þar sem ég var í vettvangsnámi. Punkturinn markar endalok þessa skemmtilega tíma. Sem þyrfti ekki að enda ef ég fengi meira en 137000 á mánuði fyrir að vinna þar.

Var ekki einhver að lofa launahækkun fyrir týpísk kvennastörf?

2007-04-01T13:56:00.000Z

Svona á ég fallega fermda stelpu :)

Ferming búin, mánuður eftir af vettvangsnámi.... þá fer ég kannski að hafa tíma til að blogga af viti :)

Góðar stundir.

2007-03-23T21:59:00.000Z

Vettvangsnám, ferming, leita að nýrri vinnu. Er hægt að vera betur skipulagður?
Annars er allt í fína bara...

2007-02-27T20:23:00.000Z

Felmturskast! Ég er að fara að prenta boðskortin fyrir fermingarveisluna. Mér líður eins og ég sé að undirbúa mig fyrir 100% próf, veit ekkert um efnið og á ekki bókina sem verður spurt úr. Anda inn, anda út.

2007-02-19T17:11:00.000Z

Þegar ég var lítil átti ég plötu þar sem Bessi Bjarnason söng fyrir börnin. Á meðal þess sem Bessi söng voru Guttavísur.

Mædd er orðin mamma hans Gutta
mælir oft á dag.

Ég skildi ekki hvers vegna Gutti ætti að hætta að verða óþekkur ef hann yrði mældur oft á dag.

Þessi minnig um misskilning rifjaðist upp í dag á meðan ég stakk mæli í bossann á litla grís.

2007-02-15T22:54:00.000Z

Börnin mín eru bara alltaf í blöðunum...

PÓLITÍK » Jón Sigurðsson og framsókn í öldudal - Arna Schram af þingi og þjóð - Ingibjörg Sólrún er tekin á teppið » NEYTENDUR » Hvernig velja skal fjölskyldumyndavélina - Garpur er sannkallað náttúrubarn » RÚSÍNAN » Leikfang vikunnar ...

2007-02-07T22:24:00.000Z

Þessari mynd stal ég af mbl.is. Mér finnst þetta hámarks rómantík og mér dettur í hug ljóð eftir Einar Má sem var einhvernveginn svona:

Eftir ca 2000 ár
þegar fornleifafræðingarnir finna bein okkar
getum við e.t.v. elskast á Þjóðminjasafninu.

2007-02-05T20:13:00.000Z

Litla Ísland:

Gríshildur býður íbúa á áfangaheimili fyrir geðfatlaða út að borða í tilefni þess að íbúinn er að flytja í aðra búsetu.

GRÍSHILDUR: Æ ég á nú eftir að sakna þín þegar þú verður flutt.

ÍBÚINN: (Smjatt, kjams) Já er það ekki?

Litla Bretland:

Andy situr á klósettinu með snakkpoka.

LOU: Now, I know it’s your birthday coming up, and I thought we could do something special. So I booked a table at the Harvester.

ANDY: Yeah I know.

2007-01-30T10:30:00.000Z

Mér til mikillar ánægju sá ég að einhverjar umræður væru farnar af stað á WebCt í dag. Hélt kannski að kennarinn hefði komið með punkta um námsefnið en ekkert hefur heyrst í honum í tvær vikur. Ég opnaði umræðuna tilbúin að troða í mig einhvern vísdóm um einstaklingsáætlanir eða námskrár. En nei. Umræðan hófst svona: "Hæ þið sem voruð að tala um að fara í átak. Nú er stefnan sett á að koma í númeri minni buxum í næstu staðlotu heldur en í síðustu staðotu."

Múahaha. Ég er að spá í að setja inn umræðu: "Hæ. Ef þið mynduð nota tímann sem annars færi í að éta á milli mála til að lesa það sem sett er fyrir í náminu - líka það sem er á erlendum tungumálum, mynduð þið örugglega minnka um tvö númer..."

2007-01-21T22:53:00.000Z

Þegar kennarinn í vinnubrögðum sagði að við hefðum gott af því að fara sjálf í greinandi viðtal vissi ég ekki að ég þyrfti virkilega á slíku að halda. En ég slæ þá bara tvær flugur í einu höggi þegar ég verð búin að panta tíma hjá félagsráðgjafanum...

Það var hrikalega gaman að mæta í allar kennslustundirnar í síðustu viku. Eftir því sem ég er lengur í skólanum því minna finnst mér ég vita. Þegar ég byrjaði í náminu hélt ég að ég vissi næstum allt sem ég þyrfti að vita, ætlaði bara að læra til að fá hærri laun. Núna finnst mér ég vita lítið en það hafa opnast margar dyr og það er svo margt sem ég hef áhuga á að gera þegar ég útskrifast. Ég er að verða afhuga því að vera yfirmaður á sambýli þar sem maður gerir lítið annað en að halda í horfinu og reyna að hafa alla ánægða. Ég er staðráðin í að nota kunnáttuna mína í að þjálfa þá sem geta gagnast af því frekar en að reyna að gera plön fyrir þá sem nenna ekki að lyfta litlafingri en bíða spenntir eftir örorkubótunum svo þeir geti farið að kaupa sér sígó eða hælaskó.

Ég hef gortað mig af því að hafa tekist að nurla saman fyrir fermingarveislu heimasætunnar. Ég telst líklega til millistéttar á Íslandi fyrst ég á pening fyrir veisluhöldunum en ekki til hástéttar þar sem ég hef ekki efni á að biðja Marilyn Manson um að spila í veislunni. Kannski gef ég 30 krónur til góðgerðarmála til að réttlæta eyðsluna.

He-man veit upp á hár hvað orðið "ulla" þýðir. Ég var að segja Skröggi talþjálfunarbrandara sem innihélt þetta orð og um leið rak sá litli út úr sér tunguna. Og þar sem við gátum ekki á okkur setið og fórum að flissa hélt hann áfram að segja brandara: henti matnum sínum í gólfið sagði "henda" og hristi svo hausinn! :D

Sem betur fer er oftast gaman að vera til. Annars væri miklu erfiðara að sigrast á því slæma. Þetta var alveg ókeypis Gríshildarspeki. Og þar sem vellur úr mér vísdómurinn fáið þið aðra í kaupbæti: Varið ykkur á fyrrverandi tengdamæðrum... þær geta verið tannhvassari en steinbítur!

2007-01-16T21:28:00.000Z

Hvað?!
Er virkilega svona langt síðan ég hef bloggað... það mætti halda að ég væri andlaus og dauð úr öllum æðum. En þeir sem þekkja mig vita að ég er allt of upptekin við að fylgjast með öllum íþróttaviðburðunum í sjónvarpinu til að eiga lausa bloggstund. Nú er til dæmis æsispennandi leikur í gangi þar sem gula liðið var næstum því búið að skora en bláa liðið verður að fara að bíta í skjaldarrendur.

Mig vantar fleiri stundir í sólahringinn eða lottóvinning svo ég geti hætt að vinna þær 6 vikur sem ég á að vera í starfsnámi.

He-man er loksins farinn að staulast um og hann kann að segja hestur og þetta. Hann kann líka að þykjast klemma sig til að fá fólk til að hlaupa til.

Ferming í aðsigi hjá Grísastelpu. Undirbúningur hafinn en mér finnst ég ekkert vera deginum eldri en 22ja þrátt fyrir allt.

Ég veit ekki meir.

2006-11-29T21:08:00.000Z

Eins árs í dag :)

2006-11-16T21:41:00.000Z

Dagur íslenskrar tungu er í dag. Af því tilefni íslenskaði grísastelpa orðið "wannabe". Framvegis mun ég nota orðið "vonlingur" yfir þá sem rembast við að vera annað en þeir eru.

Hún Marta er nú enginn vonlingur heldur afmælisbarn dagsins. Til hamingju með daginn Marta mín, hrikalega sakna ég kaffi&suðusúkkulaðidaganna okkar, langra gönguferða og fræðslu um hægðir Elínborgar. Ef ég gæti myndi ég gefa þér einn dag sem innihéldi allt ofantalið í afmælisgjöf. Myndi kannski sleppa hægðunum samt...

2006-11-06T22:26:00.000Z

BBC stendur alltaf fyrir sínu. Í kvöld horfði ég á afurð þeirra um tilraunir til að láta hunda þefa uppi krabbamein. Hundarnir virtust nokkuð seigir í þessu og framvegis mun mér ekki standa á sama ef hundur sýnir mér áhuga. Hugsanlega hefur mín brottflutta Kíkí einhverja hæfileika á þessu sviði því hún er iðin við að kroppa í fæðingabletti á fólki með beittum goggnum.

Ég veit ekki hvort ég verði góður þroskaþjálfi, skoðanir mínar virðast oft á skjön við skoðanir bekkjarfélaganna og kennaranna. Stundum er ég næstum á móti réttindabaráttu fatlaðra en það litast kannski af þeim heimtufreku ónytjungum sem ég þekki, sem hafa bara réttindi en engar skyldur. Samt skal ég útskrifast með þetta bévítans próf fyrr en síðar.

He-man verður eins árs í lok mánaðarins. Það sem tíminn flýgur - stöðvum hann!