Ríkisstjórn Íslands sýndi mikið hugrekki þegar hún bauð paranojuðum taflmanni í heimsókn enda eru Bandaríkjamenn núna komnir í fýlu og ætla að gera helming Bolvíkinga atvinnulausa með því að loka ratsjárstöðinni á Bolafjalli. Þetta er greinilega mikilvægur taflmaður því ekki var hugrekkinu fyrir að fara þegar vinirnir ákváðu að drepa peðin í Írak. Jamm forgangsröðunin er furðuleg, t.d. skil ég ekki að Dóri dojojong hafi ekki fundið betri leið til að eyða 18 milljónum af skattpeningunum okkar en að kaupa skrípamyndir af sjálfum sér og Dabba kóngi.

Jæja, annars er allt í fína bara... sleppti prófinu og er bara sátt. Jólin eru að koma á Grandann, þrjár sortir komnar í ikea kökudunka og búið að kaupa þriggja metra langan jóladúk á tíu manna veisluborðið. Fuglabúrið er skreytt með afgangs gervigreni sem Kíkí finnst gaman að plokka af og henda niður á gólf. Kermit lætur sér nægja að narta í það. Grísastelpa búin að búa til jólagjöfina okkar sem liggur innpökkuð og girnileg uppi á hillu. Við eigum hins vegar eftir að kaupa jólagjöfina hennar og ætlum að laumast í það á eftir... gaman gaman :)

Við fórum á sálmatónleika með Ellen Kristjáns á miðvikudaginn, rosa flott. Maður var næstum farin að trúa að guð væri til... Lokalagið var sama lag og hún söng við kveðjustund Grísastráks og það var erfitt. En samt gott.

Jæja, farin að jólast... góðar stundir :)