Sápa og dúllur

Ég er hætt að geta sofið frameftir vegna þess að ég er svo spennt að lesa nýjustu tölvupóstana í Fréttablaðinu. Bold and the Beautiful hvað, Forrester krísurnar blikna í samanburði við Baugsmálið.

Nú kemur örugglega bráðum í ljós að Sullenberger sé í raun launsonur Styrmis og Jónínu Ben en því hafi tekist að halda leyndu svo lengi vegna þess að hann var innmúraður í trúnað ónefnds manns sem var leynilegur guðfaðir barnsins Sullenbergers sem var gefið til fátækrar fjölskyldu í Bandaríkjunum. Fjölskyldan fékk styrk frá Sjálfstæðisflokknum til uppihalds barnsins. En þegar í ljós kom að barnið var ólöglegur innflytjandi sá Bandaríkjaforseti sér leik á borði og hótaði forsætisráðherra Íslands því að hann myndi segja frá raunverulegum foreldrum Sullenbergers (og því að pappírinn sem Mogginn er prentaður á er í raun búinn til úr húðfrumum og beinmergi dauðra kommúnista) nema íslensk stjórnvöld myndu segja já og amen við öllu sem forsetanum dytti í hug.

Allavega væri þetta ekkert ólíklegur söguþráður ef þetta væri alvöru sápa...

Annars er helsta áhugamálið mitt þessa dagana að hekla dúllur... ég hugsa að þegar þær verða loksins orðnar nógu margar og ég verð búin að festa þær saman verði það ágætis teppi fyrir fyrsta barnabarnið mitt... umm nema Grísastelpa flýti sér jafn mikið og ég, en þá verður það bara handa langömmubarninu mínu...